Президент Масуд Пезешкян жетектеген ирандык делегация Нью-Йоркто БУУнун Башкы ассамблеясынын 79-сессиясынын алкагында Тегерандын өзөктүк программасы боюнча биргелешкен комплекстүү иш-аракеттер планы (JCPOA) боюнча сүйлөшүүлөрдүн жаңы айлампасын баштоого аракет кылат.
Бул тууралуу Ирандын тышкы иштер министри Аббас Аракчи билдирди.
«Мен, Нью-Йоркто президентке караганда бир нече күнгө көбүрөөк болом жана башка өлкөлөрдүн тышкы иштер министрлери менен дагы көп жолугушууларды өткөрөм. Биз өзөктүк маселелер боюнча сүйлөшүүлөрдүн жаңы раундун баштоого аракет кылабыз», – деди Аракчи өзүнүн Telegram каналында жарыяланган видеодо.
Анын айтымында, Тегеран жаңы этапты баштоого даяр жана эгер экинчи тарап кызыкдар болсо, бул сапардын жүрүшүндө сүйлөшүүлөр кайрадан башталышы мүмкүн.
“Маалыматтар алмашылды, коомчулуктун даярдыгы тууралуу билдирүү бар. Бирок азыркы эл аралык кырдаал ушундай болгондуктан, өзөктүк келишим боюнча сүйлөшүүлөрдү кайра баштоо мурункуга караганда бир аз татаал жана чаташкандай сезилип турат”, – деген ал.
Эске салсак, 2015-жылы Иран менен АКШ, Франция, Германия, Улуу Британия, Кытай, Россия өзөктүк келишимге кол коюшкан. Ага ылайык, Тегеран уран байытууну чектеп, буга жооп катары Иранга киргизилген экономикалык санкциялар алына баштаган. Бирок 2018-жылдын май айында Дональд Трамп президент болуп турганда АКШ келишиминен чыгып, Тегеранга каршы санкцияларды калыбына келтирген. Буга жооп катары Иран келишим боюнча милдеттенмелерин этап-этабы менен кыскартканын жарыялаган.
АКШнын азыркы лидери Жо Байден Вашингтонду өзөктүк келишимге кайтарууга даяр экенин бир нече жолу билдирген. 2021-жылдын апрелинен бери Россия, Улуу Британия, Германия, Кытай, АКШ жана Франция Венада Иран тарап менен өзөктүк келишимди баштапкы түрүндө калыбына келтирүү боюнча сүйлөшүүлөрдү жүргүзүп келген, ал бир нече раунддан кийин 2022-жылдын ноябрында жыйынтыксыз аяктаган.















