Палестина-Израиль жаңжалы курчугандан бери Газа тилкесинде каза болгондордун 70%га жакынын аялдар жана балдар түзөт. Бул тууралуу Палестиналык качкындарга жардам берчү БУУнун Жакынкы Чыгыш агенттигинин (БАПОР) башкы комиссары Филипп Лазарини билдирди.
«Газа тилкесинде набыт болгондордун 70%га жакыны аялдар жана балдар», – деди ал.
Анын айтымында, үч жуманын ичинде анклавда дээрлик 3,2 миң бала набыт болгон.
Лазарини белгилегендей, Газада жай тургундар баш калкалоого аракет кылып жаткан чиркөөлөр, мечиттер, ооруканалар жана БАПОРдун мекемелери чабуулдарга дуушар болууда.
“Аларды аяшкан жок, коопсуздук издеп келген көп адам набыт болду. Газаны азыркыдай курчоого алуу жамааттык жазалоо болуп саналат”, – деди ал.
7-октябрдан бери Газа тилкесиндеги аскердик аракеттерде каза болгон балдардын саны 2019-жылдан бери дүйнө өлкөлөрүндө болгон кагылышууларда каза болгон балдардын санынан ашып кеткенин кечээ, 30-октябрда эл аралык кайрымдуулук Save the Children уюму билдирген.
Save the Children каза болгондордун саны мындан да көп болушу мүмкүн экенин белгилейт, анткени Газада дагы 1000дей бала дайынсыз жоголуп, урандылардын астында калышы мүмкүн.
«Үч жумадан бери уланып жаткан зордук-зомбулук балдарды үй-бүлөсүнөн ажыратты. … Сандар үрөй учурарлык, бирок Газада зордук-зомбулук күчөп жаткандыктан дагы көптөгөн балдар олуттуу коркунучка кептелди», — деген уюмдун Палестинадагы директору Жейсон Ли.
Палестинанын Саламаттык сактоо министрлигинин акыркы маалыматы боюнча Израилдин 7-октябрдан бери Газа тилкесин аткылоосунан каза болгондордун саны 8525ке жети, 21 миңден ашуун адам жаракат алды.


















