Туура бир жумадан кийин мектепте окуу башталат. Коомдук транспорттон көңүл калган жаным, мен жашаган тарапка тиешелүү транспорт маселесин шаар бийлигине жеткирейин дедим. Борбордун Ахунбаев — 7-апрель — Чүй проспектисине бурулган абдан чоң трассаларында коомдук транспорт жүрбөйт!
Ишенесиңерби? Ооба, жеке менчик маршруткалар каттайт, бирок коомдук транспорт жок! 31-46-автобустар Ахунбаев көчөсүнөн түшүп Аламүдүн базарын көздөй кетет, 7-автобус Горький көчөсүнөн бурулат, 7-троллейбус да Горький көчөсү менен каттайт. Ахунбаев көчөсүнөн 7-апрель көчөсү аркылуу Чүй проспектине болгону Өзбекстандан келген бою корто 10-11-автобустар бири өйдө, бири ылдый жүрөт, 11 сом алат, ичинде валидатору жок. Бишкек мэри деле билсе керек.
Ахунбаев көчөсүнөн Горький көчөсү аркылуу Совет көчөсүнө түшүп шаардын борбору менен туташтырган дагы бир чоң каттамда болгону 164-маршрутка гана жүрөт! Канча жылдан бери монополист! Же маршруткалары чоң, аба кирген таза эмес, дайыма кир! Акчага карап, жүргүнчүлөрдү ыгып-тыгып алып айдашат. Жакында окуу башталса, анык азап-тозок башталат, коомдук транспорт жок, маршруткалар аз, дайыма эл толо, албай кетишет, балдар окуудан кечигет. Балаң мектепке кечикпей, көйнөгү айрылбай-тытылбай барып келсе экен деп жүрөкзаада болмой…
Эми Бишкек мэриясына суроо: Тулпар алгыла дейсиңер, макул, алалы. Бирок ошого жараша жогоруда аталган чоң көчөлөрдө коомдук транспорт жүргүзбөйсүңөрбү? Бул көчөлөрдө же троллейбус жүрбөсө, же кадимкидей чоң автобустар жүрбөсө, эмнеге Тулпар алышыбыз керек? «Автобустар келди, дагы баланча жүз автобус келгени жатат» деп мактанасыңар, кана ошол автобустар? Эмнеге ушундай чоң көчөлөргө чыгарбайсыңар? Качан шаар бийлиги адекваттуу иш жасайт? Же митингге чыгыш керекпи?
Аскер Сакыбаева.
