Ирандын Тышкы иштер министри Аббас Аракчи Египеттин борбор шаары Каирде өткөн Ислам сегиздигине (“D-8”) мүчө өлкөлөрдүн Тышкы иштер министрлеринин кеңешинин жыйынына катышып, сөз сүйлөдү.
“D-8” же Ислам сегиздиги – Индонезия, Иран, Бангладеш, Пакистан, Түркия, Малайзия, Египет жана Нигерия кирген сегиз өнүгүп келе жаткан мусулман өлкөлөрүнүн тобу. Ал өнүгүп келе жаткан ислам өлкөлөрүнүн ортосунда бекем экономикалык байланыштарды түзүү жана алардын дүйнөлүк рыноктордогу таасирин арттыруу, ошондой эле өнөр жайы өнүккөн өлкөлөр менен диалог түзүү максатында түзүлгөн аймактык келишимдердин бири. “D-8” 1997-жылы Стамбулда Түркиянын премьер-министри (1996-1997-жылдары) Нежметтин Эрбакандын демилгеси менен түзүлгөн. Саммити дээрлик эки жылда бир өткөрүлүп келет.
Сапардын алкагында Аракчи Египеттин тышкы иштер министри Бадр Абдул Ати, Пакистандын премьер-министринин орун басары жана тышкы иштер министри Мухаммед Исхак Дар жана Малайзиянын жогорку билим министри Замбри Абдул Кадир менен эки тараптуу жолугушууларды өткөрүп, жалпы кызыкчылык жараткан айрым темаларды талкуулап, пикир алмашышты.
Жыйындын катышуучулары аймактык маселелерди, негизинен Газа тилкесиндеги кырдаалды талкуулашты.
Анда сөз сүйлөгөн Аббас Аракчи ислам дүйнөсү 2023-жылдын 7-октябрынан бери сионисттик режимдин Газа, Ливан жана Сириядагы болуп көрбөгөндөй мыкаачылыгынан жапа чегип жаткан учуру экенин белгилеп, “D8” уюму Израилдин Газага жасаган кол салышын айыптаган өлкөлөрдүн биринчи тобунун арасында болгонун белгиледи.
Ал ошондой эле үстүбүздөгү жылдын июнь айында Стамбулда “D8” министрлер кеңешинин Газа боюнча кезексиз жыйыны өткөрүлгөнүн эске салды.

Ирандын ТИМ башчысы эл аралык коомчулук сионисттик режимдин аймактагы агрессивдүү аракеттерин, согуш кылмыштарын, адамзатка каршы кылмыштарын жана геноциддерин токтото албаганын, буга көбүнчө АКШ өкмөтүнүн Израилге саясий, аскердик, чалгындоо жана каржылык колдоосу себеп болгонун белгиледи.
Аракчи 19-декабрда Каирде өтө турган Ислам өлкөлөрүнүн “D8” тобунун президенттеринин жыйынында дүйнөгө Израилдин Газа, Ливан жана Сириядагы агрессиясы жана зордук-зомбулуктары токтоосуз түрдө токтотулушу керек деген күчтүү билдирүү берилет деген үмүтүн билдирди.
Ислам өлкөлөрүнүн “D8” тобуна мүчө өлкөлөрдүн мамлекет башчыларынын XI жолугушуусу бүгүн, 19-декабрда Каир өтөт. Саммиттин негизги темасы “Жаштарга инвестиция салуу жана кичи жана орто бизнести колдоо: эртеңки экономиканы калыптандыруу”. Ага Ирандын президенти Масуд Пезешкиан катышат, ал эми Түркиянын президенти Режеп Тайип Эрдогандын катышуусу күтүлүүдө. Палестина мамлекетинин президенти Махмуд Аббас да конок катары катышууга ниеттенүүдө.
“Сионисттик режим жана анын союздаштары жасаган иштери үчүн жооп бериши керек; Газа калкынын гуманитардык жардамга тоскоолдуксуз жетүүсү үчүн Газада туруктуу ок атышпоо түзүлүшү керек; Палестина маселеси жана палестиналыктардын өз тагдырын өзү аныктоо укугу ишке ашуусу керек; Оккупацияланган аймактарды аннексиялоого Израилдин ар кандай аракетине жол берилбеши керек; Сионисттик режимдин күчтөрү Газа, Ливан жана Сириядагы басып алынган аймактардан дароо чыгып кетүүсү зарыл”, – деди ал.
Аркчи ошондой эле “D8” уюмуна мүчө өлкөлөр азыркы кырдаалдан келип чыккан кыйынчылыктарды жана экономикалык көйгөйлөрдү чечүү үчүн Палестина менен Ливанга колдоо көрсөтүүгө даяр экенин билдирди.


















