Ирандын мурдагы президенти Махмуд Ахмадинежаддын кеңсеси саясатчынын Израилдин чалгын кызматтары тарабынан жашыруун жалдангандыгы тууралуу New York Times гезитинин маалыматын төгүндөдү.
The New York Times гезити АКШдагы жана Ирандагы өз булактарына таянып, Израилдин тышкы чалгын кызматы «Моссад» бир нече жыл бою Ирандын мурдагы президенти Махмуд Ахмадинежадды жашыруун кызматташууга тартууга аракет кылганын жазган. Басылманын маалыматына ылайык, Израиль аны Тегерандагы азыркы бийликти кулатуу жана өлкөнүн жаңы лидери кылып дайындоону көздөгөн.
Ахмадинежаддын кеңсеси бул маалыматка жооп берип, The New York Times гезити Ахмадинежад тууралуу толугу менен жалган маалымат таратып, аскердик коркунучтарга байланыштуу сезимтал саясий кырдаалды пайдалануу менен коомдук пикирди козгоого аракет кылганын билдирди.
Ошондой эле билдирүүдө аталган макала Иранга каршы жүргүзүлүп жаткан психологиялык согуштун бир бөлүгү экени белгиленип, мындай маалыматты жарыялаган The New York Times гезити ишенимге татыктуу эмес экени айтылды. Кеңсенин маалыматына караганда, жарыяланган материал көңүл бурууга да арзыбайт.
«The New York Times гезитинин Голливуд стилиндеги ырастоолору өзүнчө төгүндөөнү талап кылбайт. Бирок өлкөдөгү кырдаалды жана учурдагы саясий абалды эске алуу менен, макаладагы бардык билдирүүлөрдү толугу менен жалган деп кескин түрдө четке кагабыз», — деп айтылат билдирүүдө.
Махмуд Ахмадинежад 2005-жылдан 2013-жылга чейин Ирандын президенти болгон.
28-февралда башталган 40 күндүк согуш учурунда Ахмадинежад АКШ менен Израилдин Тегеранга жасаган соккусунда каза болгону айтылып, кийинчирек бул маалымат четке кагылган. Ахмадинежад акыркы жолу өлкөнүн маркум жогорку лидери Али Хаменеини акыркы сапарга узатуу зыйнатына катышкан.
Батыш маалымат каражаттары буга чейин дагы Ирандын бир катар аткаминерлери тууралуу такталбаган жалган маалыматтарды таркатып келишкен. Март айынын башында Ирандын Ислам революциясынын сакчылар корпусунун “Кудс” күчтөрүнүн командачысы генерал Исмаил Каани Израиль менен кызматташкан деп шектелип, тыңчылык айыбы менен камакка алынып, коопсуздук органдары тарабынан катуу суракка алынууда деген маалыматтар таратылган. Бирок акырында бул маалыматтар да жалган болуп чыккан.















