Иранда Ислам революциясынын шейит болгон лидери аятолла Али Хаменеи менен коштошуу зыйнаттары өтүп жатат. Өлкө тарыхындагы эң масштабдуу зыйнатты дээрлик бардык кадыр-барктуу эл аралык маалымат каражаттары кеңири чагылдырышууда.
CNN
CNN телеканалынын кабарчысы Фредерик Плейтген Тегерандын борборунан түз байланышта билдиргендей, борбор калаанын көчөлөрүнө мурдагы лидери менен коштошуу үчүн миллиондогон адамдар чыгышы күтүлүүдө.
Al Jazeera
Аятолла Хаменеини акыркы сапарга узатуу аземи иран элинин биримдигинин символуна айланышы күтүлүүдө. Каналдын баамында, АКШ менен Израилдин Иранга каршы жүргүзгөн согушу күтүлгөндөй натыйжа берген жок: бийлик кулаган жок, тескерисинче, мурдагыдан да бекемделди.
Euronews
Эгер аземге 15–20 миллион адам катышат деген болжол ырасталса, бул Иран тарыхындагы эң масштабдуу акыркы сапарга узатуу зыйнаты болуп калат.
The Independent
Хаменеини акыркы сапарга узатуу жана жерге берүү аземи масштабы жана мааниси боюнча тарыхта өтө аз кездешкен окуялардын бири катары бааланууда.
Associated Press
Агенттиктин маалыматына ылайык, ал отуз жылдан ашуун жетекчилиги учурунда Иранды кайра калыбына келтирип, өлкөнү аймактагы таасирдүү державага айландыра алды.
Al Jazeera
Аятолла Хаменеинин сөөгү акырында Имам Резанын күмбөзү жайгашкандыгы үчүн Ирандагы эң ыйык шаар деп саналган Мешхед шаарында жерге берилет. Канал белгилегендей, шиит мазхабындагы эң урматталган инсандардын биринин жанында жерге коюлуу чоң сыймык болуп эсептелет жана бул аятолла Хаменеинин Ирандын жогорку саясий лидери жана эң жогорку диний жетекчиси катары ээлеген ордун чагылдырат.
Agence France-Presse (AFP)
Аземге 15–20 миллион аза күтүүчү катышат деп күтүлүүдө. Эгер бул көрсөткүч ырасталса, ал Иран тарыхындагы эң ири акыркы сапарга узатуу аземи болуп калат. Ошондой эле Иран парламентинин төрагасы Мохаммад Багер Галибаф бул окуяны «Иран тарыхындагы эң маанилүү учурлардын бири» деп атады.
Ирандын жогорку руханий лидери аятолла Али Хаменеи үстүбүздөгү жылдын 28-февралында АКШ менен Израилдин Иранга каршы баштаган аскердик аракеттеринде шейит болгон.
Тегерандагы иш-чаралар 6-июлга чейин созулат. 7-июлда маркумдун сөөгү Кум шаарына жеткирилет. 8-июлда Ирактын Кербала жана Наджаф шаарларында коштошуу зыйнаты өтөт.
Ал эми 9-июлда анын сөөгү кайрадан Иранга алынып келип, туулуп-өскөн Мешхед шаарында жерге берилет.Ирандын укук коргоо жана коопсуздук органдары өлкө лидери аятолла Али Хаменеи менен коштошуу, акыркы сапарга узатуу жана жерге берүү аземдерине жалпысынан 18 миллиондон 35 миллионго чейин адам катышарын болжолдошууда. Алардын ичинен Тегеранда 6–17 миллион адамдын чогулушу күтүлүүдө.
Тегерандагы коштошуу аземине 100гө жакын өлкөнүн өкүлдөрү катышууда. Алардын арасында өлкө башчылары, өкмөт башчылары, парламент төрагалары, тышкы иштер министрлери, саясатчылар, атайын өкүлдөр жана коомдук ишмерлер бар.















