Нидерланд Газа тилкесиндеги кырдаалдын курчушуна байланыштуу Израилге аскер-деңиз техникасын жеткирүүнү токтотуп жатканын өлкөнүн Тышкы иштер министрлигине шилтеме берүү менен NOS телерадиокомпаниясы билдирди.
Телекомпаниянын маалыматына караганда, Нидерланддын тышкы иштер министрлиги Израилге аскер-деңиз кемелеринин компоненттерин экспорттоого берилген үч уруксатты жокко чыгарууда.
Нидерланддын Тышкы иштер министрлигинин өкүлүнүн айтымында, уруксаттар өткөн айда “Газадагы кырдаалдын начарлашынан” жана аскердик техниканын “каалабаган акыркы колдонулушу” тобокелдигине байланыштуу улам кайра каралып, жокко чыгарылган.
Нидерланддагы укук коргоочулар жана эксперттер Израилге экспорттолгон курал-жарак Газа тилкесиндеги зордук-зомбулукка жана геноцидге салым кошушу мүмкүн деген кооптонуусун бир нече жолу билдиришкен.
Нидерланддын Эл аралык коомдук укук боюнча консультативдик комитети (CAVV) 5-августта жарыялаган докладында Нидерланд өкмөтү геноциддин, анын ичинде Газа тилкесинде алдын алуу үчүн чара көрүүгө мыйзамдуу түрдө милдеттүү деген бүтүмгө келген.
7-августта Нидерланддын тышкы иштер министри Каспар Велдкамп Газа тилкесиндеги кырдаал боюнча чукул парламенттик талкууда Израилге курал экспорттоо катуу көзөмөлдө болгондуктан бул өлкөгө алардын кириши “иш жүзүндө мүмкүн эмес” экенин айтты, ал эми көптөгөн депутаттар көрүлгөн чаралар жетишсиз деп эсептеп, бийликти Израил мамлекетине каршы курал эмбаргосун күчөтүүгө чакырды.
Нидерланддык эксперттер жана гуманитардык уюмдар өлкө бийлиги Израилдин жетекчилигине кысымды күчөтүү мүмкүнчүлүктөрүн көз жаздымда калтырып жатканын бир нече жолу белгилешкен. Гуманитардык уюмдар, анын ичинде Oxfam Novib дароо чара көрүүгө: Израилге курал-жарак жеткирүүнү токтотууну жана БУУнун көзөмөлүндөгү Газа тилкесине гуманитардык жардамды өткөрүүнү талап кылышкан.


















