Кыргызстандын Тышкы иштер министрлигинин консулдук департаменти Түркияда кармалган кыргызстандык мугалим Азамат Нурматовдун үй-бүлөсү менен жолугушуу өткөргөндүгүн маалымдады.
Министрликтин басма сөз кызматы билдиргендей, жолугушуунун жүрүшүндө кармалган жарандын үй-бүлөсүнө дипломатиялык мекеме тарабынан Азаматтын укуктарын жана мыйзамдуу кызыкчылыктарын коргоого багытталган чаралар тууралуу маалымат берилди.
«Тергөө жана процесстик иш-чараларды жүргүзүү боюнча Түркиянын мыйзамдарын деталдуу талкуулоого өзгөчө көңүл бурулду. Буга байланыштуу Стамбулдагы башкы консулдуктун кызматкери менен видеоконференция уюштурулуп, анда бул процессти жөнгө салуучу жол-жоболор жана Кыргызстандын жаранынын укуктарын коргоо боюнча мүмкүн болгон кадамдар боюнча түшүндүрүү иштери жүргүзүлдү»,- деп билдирди министрлик.
Белгиленгендей, учурда Азамат Нурматов менен анын үй-бүлөсүнүн телефондук сүйлөшүүсүн уюштуруу боюнча иштер жүрүп жатат.
Мындан тышкары, аны коргоо үчүн мүмкүн болгон мыйзамдуу укуктук кадамдар такталды.
Эске сала кетсек, Ысык-Көл облусунун Каракол шаарындагы Х. Карасаев атындагы лицейдин математика мугалими Азамат Нурматов Стамбул шаарынын аэропортунда кармалган. Ал окуучуларды математика боюнча эл аралык олимпиаданын экинчи туруна катыштыруу үчүн коштоп барган.
Тышкы иштер министринин орун басары Алмаз Имангазиев 28-апрелде парламентте өтүп жаткан жыйында мугалимдин кармалышынын себебин атады.
Анын айтымында, Түркиянын укук коргоо органдары Азамат Нурматовду 2016-2017-жылдардагы төңкөрүш аракети маалында Түркияда болгондугун, ошондой эле Фетхуллах Гүлендин тарапкерлери колдонгон мобилдик тиркемени колдонгондугу үчүн кармаган. Ал ушул маселеге байланыштуу буга чейин Түркияда издөөгө алынган.
Кошумчалай кетсек, Кыргызстандын тышкы иштер министрлиги Түркия элчилигинин консулуна мугалимдин кармалышына байланыштуу оозеки нота тапшырды.


















